Ֆեյսբուքում այս գրառումը կարդացի՝ համապատասխան նկարով և մտածեցի՝ ինչքա՜ն մարդիկ կան, որ երջանկության համը չեն ճաշակել և չեն պատկերացնում դիմացինին երջանկացնելու քաղցրությունը։ Անգամ չեն պատկերացնում, որ քեզ երջանկացնող մարդուն կարելի է «մի փոքրիկ ջերմությամբ վարձահատույց լինել»։ Այս փոքրիկ գրառումը վկայություն է, որ մենք ապրում ենք տաք ու սառը փոփոխական հոսանքների ազդեցության տակ ու թե որը կհաղթի՝ կախված է այն բանից, թե որը կսփռենք․․․ Սերը ծաղկի սերմի պես է, մինչև հողը չգցես, չհասցնես ընթերցողին, ծիլ չի տա։ Կարծում եմ գրառողը սեր, ջերմություն սփռող է, վաղուց եմ նրա ջերմ գրառումներին հետևում․․․
 
Շողեր Վիրաբյան
 
Այսօր մի սիրուն տեսարանի ականատես եղա: Երիտասարդ կինը փողոցում ինչ-որ մեքենայի վրա արագ-արագ գունավոր սրտիկներ էր փակցնում: Սկսեցի նայել: Կնոջ դեմքին լուսավոր ժպիտ կար: Զգացվում էր, որ անակնկալ է պատրաստում մեկի համար: Մեկ էլ կնոջը մոտեցավ հիսունին մոտ մի տիկին ու մի տեսակ թթված հայացքով հարցրեց:
 
-Էս ի՞նչ ես անում:
 
-Ամուսնուս մեքենան է: Իր համար անակնկալ եմ պատրաստել,- պատասխանեց երիտասարդ կինը:
 
-Ինչու՞: -Դե , այսօր մեր ծանոթության ութ տարին է:
 
-Հետո ինչ, որ ութ տարին է,- չոր նետեց կինը:
 
-Բա ինքը քո համար ինչ է արել:
 
-Ինքը ինձ երջանկացրել է: -Էս բոլոր սրտիկների վրա դու ես գրե՞լ:
 
-Հա իհարկե: Գիշերը իրենից գաղտնի 500 սրտիկների վրա գրել եմ, որ իրեն շատ եմ սիրում, որ ինքը լավ ամուսին է, որ ինքը լավ հայր է, որ....
 
Կինը շարունակում էր իր նոթոտ հարցերը:
 
-Բա էդ տոպրակի վրա ինչ է գրված:
 
-Գտնված երազ:
 
-Բա տոպրակի մեջ ինչ ես դրել:
 
-Մի տուփ ՙՙՌաֆայելլո՚՚:
 
-Էդ Ռաֆայելլոն է հա՞ քո գտնված երազը- չոր-չոր շարունակում էր կինը:
 
Ու ես նորից ժպտալով նայեցի երիտասարդ կնոջը, որն այդպես համբերությամբ էր պատասխանում անծանոթ կնոջ, չգիտեմ նախանձով ասեմ, թե չարությամբ տրված հարցերին: Նա մեղմ ժպտում էր ու սպասում, որ արդեն ընդմիջման ժամ է ու մի քանի րոպեից ամուսինը դուրս կգա ընդմիջման գնալու, կտեսնի սիրելի կնոջն ու իրենց սիրուն ձագուկներին ու այդ օրը իրենց համար կրկին տոն կդառնա:Տոն, որը միշտ իրենց հետ է:
 
․․․Իսկ անցորդները քայլում էին փողոցով, հասցնում կարդալ սրտիկների վրայի լույսով ողողված գրառումներն ու ժպտալով անցնում: Երջանիկ եղեք: