Tert.am-ի հետ զրույցում Երևանի քաղաքապետ Տարոն Մարգարյանի խորհրդական Գոռ Վարդանյանն անդրադառնում է Երևանի ավագանու նիստի ժամանակ տեղի ունեցած ծեծկռտուքից հետո տարբեր մեկնաբանություններին, իր մարզադպրոցներից երեխաներին հանելու կոչերին և ՀՀԿ-ականների՝ կատարվածի շուրջ արձագանքին:
— Պարո՛ն Վարդանյան, Հայաստանի Հանրապետական կուսակցությանը Երևանքի քաղաքապետարանում «Երկիր Ծիրանի» խմբակցության հետ ունեցած միջադեպից հետո, չպաշտպանեց ՀՀԿ ավագանուն: ՀՀԿ թիմի արձագանքը Ձեզ չզարմացրե՞ց, չէ՞ որ իրենք էլ ասացին, որ կին քաշքշելն այնքան էլ լավ բան չէ:
— Թողնենք տարբեր խմբակցությունների արձագանքը, որովհետև տարբեր մարդիկ իրենց տարբեր անձնական անկյուններից տարբեր կերպ են մեկնաբանում:
— Խոսքը ՀՀԿ-ի մասին է, որն այդքան էլ ՀՀԿ ավագանուն չպաշտպանեց: Չե՞ք կարծում:
— Ես չեմ կարծում: Ես ընդհանուր երևույթը բացասական եմ դիտում: Առաջինը՝ սա պրովոկացիա էր, որին ինչ-որ չափով հասան պրովոկատորները, իսկ ընդհանուր երևույթին, կարծում եմ, որ իրավապահ մարմիններն իրենց գնահատականը կտան, որից հետո մենք կրկին կներկայացնենք մեր գնահատականները: Կառաջարկեմ սպասել որոշ ժամանակ, քանի որ գործն արդեն իրավապահների մոտ է: Եվ իմ բոլոր գործողություններին իրավական մարմինները կտան պատասխան: Իսկ ինչ վերաբերում է կանանց … վերջին շրջանում այդ ձևակերպումներին՝ կին ծեծել և այլն … գիտեք…:
— Կոնկրետ Ձեր մասին ասում են, որ ֆիլմերում մարմնավորում եք հանուն արդարության համար մարտնչող տղաների, իսկ իրական կյանքում կին եք ծեծում:
— Հենց դա եմ փորձում Ձեզ բացատրել: Բռնություն չի կարելի, կին թե տղամարդ, և առավել ևս՝ կին, որովհետևը կինն ընտանիքի սրբությունն է, և մենք սիրում, խոնարհվում ենք մեր կանանց առաջ, առանց կնոջ ընտանիք, պետություն երևույթները չեն լինում: Բայց եկեք ընդունեք, որ կինն էլ պահելակերպն ու կարգավիճակը պետք է կարողանա ճիշտ ձևով դրսևորել տղամարդկանց մոտ, որ հարգանքի արժանանա: Ես չեմ ուզի, որ ինչ-որ երեք կանանցով չափեն մեր ազգի մնացած բոլոր կանանց: Ես անգամ այնտեղ էլ եմ, որ, ասում եմ, խնդրում եմ ձեզ, մի քիչ կանացի պահեք, որովհետև էդ լպիրշությանը, որ իրենք արեցին, չեմ կարծում, որ վայել է հայ կնոջը: Եվ իրական հայ կնոջ տեսակը մենք շատ գնահատում ենք: Իսկ ինչ վերաբերում է կին ծեծելուն, ես ոչ մեկի չեմ ծեծել, հեռացրել եմ, որպեսզի…:
 — Բայց Դուք այն մարդկանց կողքին էիք, ովքեր ծեծում էին:
— Այնտեղ ոչ ոք կին չի ծեծել: Առաջին ագրեսիան իրենց կողմից է դուրս եկել, և ամեն բան անում էին, որ կոնֆլիկտային իրավիճակ լինի և այդ պահի դրությամբ ոչ ոք չգիտեր՝ ինչ է կատարվում այդտեղ. կային ուշագնացություններ, էդ հոտն էր, իրենք դիմակներով և ձեռնոցներով էին, և անձամբ ես՝ որպես անվտանգության մասնագետ, մտածեցի, որ սա ինչ-որ  ահաբեկչական ակցիա է, որը պետք է կանխվեր: Այդ պահին այդպես էր երևում: Եվ իմ տարբերակն իրենց միջանցք հանելն էր, իսկ իրենց այնտեղից օգնել, որ դուրս գային, խոսելով հնարավոր չէր: Կրկնում եմ՝ միտումնավոր, դիտավորյալ սարքած շոու էր սա, և պարզապես ավագանու այդ կին անդամին մի կերպ հանեցի, հետո հասկացա, որ մյուսը լարում է իրավիճակը, ստիպված բռնեցի և հանեցի միջանցք, որպեսզի հանդարտեցնեմ իրավիճակը: Բայց, կրկնում եմ, այս ամենի պատասխանը կտան իրավապահ մարմինները:
— Ասում եք՝ հոտ, ուշագնացություններ և այլն: Նուբարաշենցիներն արդարացրեցին ԵԾԿ-ին և անձամբ Ձեզ մի նուբարաշենցի կին դիմեց՝ ասելով՝ Գոռ Վարդանյան, մի հատ շնչեցիր, ասացիր՝ յախք, սրտներդ խառնեց, իսկ մենք ինչպե՞ս ենք 5 տարի շնչում այս հոտը:
— Ցանկացած տհաճ տեսարան, տհաճ հոտ ցանկալի չէ, բայց սա Երևանի քաղաքապետարանի ավագանին է և ոչ ոք չգիտեր՝ այդ ինչ լուծույթներ են, որովհետև դրանք կոյուղու ջրի լուծույթների հոտեր չունեին, այլ թունավոր հոտեր էին:  Իսկ այդ պահի դրությամբ 100-ից ավելի մարդ կար Ավագանիում, որոնց կյանքը վտանգի տակ է։
— Պարո՛ն Վարդանյան, Դուք ԱՄՆ քաղաքացի՞ եք:
-Ես երկքաղաքացի եմ՝ Հայաստանի ու ԱՄՆ քաղաքացի:
— Քաղաքացիության մասին հարցը տվեցի, որովհետև ԱՄՆ-ից լուրեր են հասնում, որ Կալիֆոռնիայում ինչ-որ շրջանակների կողմից ստորագրահավաք է սկսվել ՀՀԿ ավագանու անդամներին ԱՄՆ մուտքի վիզա ստանալ (եթե Գոռ Վարդանյանը քաղաքացի չլիներ, ապա դա նրան ևս կվերաբերեր) թույլ չտալու համար:
— Ես չեմ կարծում, որ Ամերիկայի կառավարությունը նման անհիմն խոսակցությունների կարող է ուշադրություն դարձնել: Մեր հայկական խոսակցություններն են:
— Իսկ այն խոսակցությունները, թե կոչեր են հնչում, որ ԱՄՆ-ում և ՀՀ-ում գտնվող Ձեր մարզադպրոցներից իրենց երեխաներին հանելու մասին, ճի՞շտ են: Այդ միջադեպից հետո մարդիկ իրենց երեխաներ Ձեզ պատկանող դպրոցներից հանո՞ւմ են:
— Մեր դպրոցներում նման բան չի նկատվել, չգիտեմ՝ կարող է ինչ-որ անհատ իր երեխային ուզենա հանել կամ չհանել: Մենք նման ոչ մի շարժ չունենք: Ւսկ մնացածը, ուղղակի մարդիկ օգտագործում են Գոռ Վարդանյան անունն իրենց PR-ի համար: Եվ այսօր շատ հեշտ է սոցցանցերում կեղծ ինչ-որ էջ բացել ու բան պետք չէ՝ Գոռ Վարդանյան են ավելացում հոդվածի վրա, և … մեծ ուշադրություն:
— Այսինքն՝ Ձեր գործունեությունն այս ոլորտում քաղաքային իշխանության պատճառով չտուժեց:
-Ոչ (ծիծաղում է): Դրանք կրթական օջախներ են, մենք դաստիարակում ենք երեխաների և մի կապեք երեխաների դաստիարակությունն ինչ-որ այլ, քաղաքական, որոշակիորեն չկայացած ուժերի հետ, որոնք օգտագործում են էդ անունն իրենց PR-ի համար: