Կեմերովոյի «Զիմնյայա վիշնյա» առեւտրի կենտրոնի գլխավոր տնօրեն Նադեժդա Սուդդենոկը ցուցմունք է տվել՝ հրդեհի գործով հարուցված քրեական գործի շրջանակներում: Նրա խոսքերը տեղադրվել են Telegram-ի Huepub ալիքում, փոխանցում է Lenta-ն:
 
Գլխավոր տնօրենը համոզված է, որ հրդեհի պատճառը դիտավորությունն է: Նրա խոսքերով, նա մեկ անգամ չէ, որ առեւտրի կենտրոնից դուրս է հրավիրել գնչուական արտաքինով երիտասարդների, որոնք իրենց վատ են պահել՝ անվճար խաղացել են ավտոմատներով, գրել զուգարանների պատերին, նրանց մասին հաղորդում են թողել ոստիկանությունում, սակայն գնչուները պատասխանատվության չեն ենթարկվել ոչ մի անգամ:
«Կինոսրահների դռներն առեւտրի կենտրոնում երբեք չեն փակվել, ես ինքս եմ շրջայցեր կատարում, ինքս եմ հավաքում տարածքը»,-հայտարարել է Սուդդենոկը: Հրդեհի մասին իմանալու առաջին իսկ պահին նա իր աշխատակիցներին հարցրել է՝ արդյո՞ք հաջողվել է բոլորին դուրս բերել առեւտրի կենտրոնից, ինչին ի պատասխան աշխատակիցները հայտնել են, որ ամեն բան կարգին է: Կնոջ պատմելով, ինքը հետո է միայն իմացել փակված կինոդահլիճների ու զոհերի մասին. «Աշխատակիցը, որին ես հարցրել եմ, ասել է, որ պայթյուն է լսել մանկական գոտուց ու տեսել է կրակի սյունը, խաղային ատրակցիոնները չէին կարող այդպես բռնկվել, սա դիտավորյալ այրում է եղել»,-եզրափակել է գլխավոր տնօրենը:
Նա չի ընդունել իր մեղքը կատարվածում, փոխանցում է «360» ալիքը, կինը նշել է, որ ինքը կատարել է իր առջեւ դրված բոլոր աշխատանքային պարտավորությունները:
Նադեժդա Սուդդենուկին կալանավորել են առեւտրի կենտրոնում բռնկված հրդեհի քրեական գործի շրջանակներում, որի արդյունքում 64 մարդ էր զոհվել, 41-ը՝ երեխաներ:
Ընդհանուր առմամբ, ձերբակալվել է 5 անձ, որոնց թվում հսկիչն է, որն անջատել էր հրդեհի ազդանշանը: