Lurer.com-ը գրում է. «Մանկապարտեզի երեխաներին կերակրում են ռեստորանի մնացորդներով: Այս մասին տեղեկանում ենք համացանցում հայտնված մի գրառումից, որտեղ նշվում է, որ այս մասին ահազագել են Արմավիրի մարզի Այգեկ համայնքի մանկապարտեզ հաճախող երեխաների ծնողները:
 
Համացանցում մասնավորապես գրել են. «Արմավիրի մարզի Այգեկ գյուղի մանկապարտեզի տնօրեն Նելլին, ով ԱԺ նախկին պատգամավոր Առաքել Մովսիսյանի (Շմայս) կինն է, ինքնատիպ թալանի ձև է գտել: Նրա ղեկավարած մանկապարտեզի ծնողները վախեցած ու մտահոգված զանգահարել են մեզ՝ տեղեկացնելով, որ Առաքել Մովսիսյանի՝ Շմայսի կինն իր ընտանիքին պատկանող, Արգավանդի խճուղու վրա գտնվող «Անգելինա» ռեստորանի սննդի մնացորդներով կերակրում է մանկապարտեզ հաճախող իրենց երեխաներին՝ գրպանելով յուրաքանչյուր ամիս սննդի համար հավաքվող ծնողական գումարները:
 
«Մեր երեխաների առողջությունը վտանգված է, ոչ-ոք համարձակություն չունի այդ խելագար ամուսիների դեմ դուրս գալու համար, մի բան արեք՝ կանխվի, աղաչում ենք,- լացակումած ասում էին այգեկցիները»:
 
ԼՈւՐԵՐ.com-ը մեկնաբանություն ստանալու համար զրուցեց Այգեկի մանկապարտեզի տնօրեն Նելլի Մովսիսյանի հետ, սակայն վերջինս հերքեց տարածված լուրերը. «Կարող են գալ և ճշտել, թե ինչ է կատարվում մանկապարտեզում. Թող գան, տեսնեն՝ ինչ ենք մատուցում երեխաներին: «Անգելինա» ռեստորանը չի գործում, եթե անգամ գործեր էլ՝ դա ի՞նչ կապ կարող էր ունենալ մանկապարտեզի հետ: Առանց ճշտելու՝ անհիմն խոսում են»,- պարզաբանեց մանկապարտեզի տնօրենը:
 
Մովսիսյանը հավաստիացրեց՝ սնունդը երեխաներին մատուցվում է սահմանված օրենքին համապատասխան. «Երեխաներին մատուցում ենք թարմ միս: Այժմ կերակրում ենք հավի մսով, մինչև սպանդանոցային մսի հարցը լուծվի: Գրատախտակին ամեն օր գրվում է սննդակարգը և ծնողները հնարավորություն ունեն տեսնել, թե ինչ են ուտում իրենց երեխաները»,- ասաց նա:
 
Մանրամասները՝ սկզբնաղբյուրում