«Ժողովուրդ» օրաթերթը գրում է.
 
 «Վերջին ներքաղաքական բուռն իրադարձությունների վերաբերյալ լռում է «Քաղաքացիական պայմանագիր» կուսակցության վարչության նախագահ, ԱԺ «Ելք» խմբակցության պատգամավոր Սասուն Միքայելյանը: Նա չմասնակցեց նաեւ ԱԺ այս նստաշրջանին: Պատճառը, պարզվում է, Միքայելյանի առողջական խնդիրներն են: «Ժողովուրդ» օրաթերթի տեղեկություններով` Միքայելյանը մեկնել է արտերկիր, վիրահատվել: Արցախյան պատերազմի ժամանակ «Սասուն» ջոկատի հրամանատար Սասուն Միքայելյանը բեկորային վնասվածքներ էր ստացել, եւ մինչեւ հիմա նրա մարմնում մի քանի տասնյակ բեկորներ են մնացել, որոնք էլ նորագոյացությունների պատճառ են դարձել: «Ժողովուրդ» օրաթերթը տեղեկացավ, որ վիրահատությունն անցել է բարեհաջող, Միքայելյանն ապաքինվում է»: Ավելի մանրամասն՝ «Ժողովուրդ» օրաթերթի այսօրվա համարում:
 
Հիշեցնենք, որ՝. 
 
Սասուն Մեխակի Միքայելյանը (նոյեմբերի 7, 1957, Ախտայի շրջան, ՀԽՍՀ, ԽՍՀՄ), հայ քաղաքական - կուսակցական գործիչ է, ազատամարտիկ, ՀՀ Ազգային ժողովի պատգամավոր, Հրազդանի նախկին քաղաքապետ, Երկրապահ կամավորական միության վարչության անդամ (1993 թ.-ից) և ԵԿՄ Հրազդանի տարածքային բաժանմունքի նախագահ (1996 թ.-ից)։