Իրանի նախագահ Հասան Ռոհանիի եղբայրը՝ Հուսեյն Ֆերեյդունը, որը ձերբակալվել է դեռ 2017 թվականին ֆինանսական հանցագործություններ կատարելու կասկածանքով, բանտարկության է դատապարտվել։ Այս մասին հայտնում է ISNA լրատվական գործակալությունը։

Նշենք, որ Ֆերեյդունի եւ եւս մի քանի մարդու հետ կապված հատուկ հետաքննություն է անցկացվում մի քանի ուղղություններով, որոնց մի մասը դեռ ընթացքի մեջ է։ Պաշտոնական հայտարարության մեջ նշվում է, որ Հուսեյն Ֆերեյդունը մեղադրանքի մի մասով արդարացվել է, սակայն մեղադրանքի մյուս մասերով դատապարտվել է բանտարկության։

Պետական ծառայողների դատական դեպարտամենտի ղեկավար Համիդ Ռըզա Հոսեյնին լրատվամիջոցի հետ զրույցում ասել է, որ դեռեւս չի մեկնաբանի, քանի որ դատավճիռը վերջնականապես դեռ ուժի մեջ չի մտել։ Հոսեյն Ֆերեյդունը 2015 թվականին եղել է ԻԻՀ հատուկ բանագնացը իրանական Միջուկային ծրագրի հարցով բանակցություններում։