Դերասանուհի Նարինե Ոսկանյանը շտապ սրտի բաց վիրահատության կարիք ունի, ինչի համար 3 միլիոն դրամ է անհրաժեշտ, սակայն նա վճարունակ չէ։ Tert.am Life-ի հետ զրույցում Նարինեն իրեն բնորոշ հումորով ասաց, որ բժիշկները գիտեն` իր սիրտը ոսկի է, ուզում են գողանալ:
 
Նրա խոսքով՝ առողջական այլ խնդիրներ` շաքարային դիաբետ, բարձր ճնշում, ողնաշարի ճողվածք, վաղուց ունի, բայց սրտից երբեք չի դժգոհել. «Սրտխփոցներ ունեցել եմ, բայց հասարակ դեղեր եմ խմել ու անցել են: Օրեր առաջ կրծքավանդակիս, թիկունքիս հատվածում սարսափելի ցավեր ունեցա, շտապ օգնություն կանչեցինք, տեղափոխեցին հիվանդանոց, ու պարզվեց` սիրտս է: Շաքարային դիաբետի պատճառով սրտիս մի քանի անոթ խցանվել է, բաց վիրահատության կարիք կա, բայց քանի որ ես գեր եմ, հնարավոր է` օրգանիզմս չդիմանա: Բժիշկները դեռ խորհրդակցում են, եթե բաց վիրահատություն չանեն, 5 ստենդ կտեղադրեն»:
  
Ավելի ուշ դերասանուհին ֆեյսբուքյան ուղիղ եթերում հայտնել էր, որ իր հետ կապվել է  ՀՖՖ նախկին նախագահ Ռուբեն Հայրապետյանը, եւ ասել, որ  ուղարկել է վիրահատության  համար անհրաժեշտ ողջ գումարը: